Wata sabuwar manufar gwamnatin ƙasar China ta bai wa kayayyakin da ake samarwa a nahiyar Afirka damar shiga kasuwanninta ba tare da biyan haraji ba, na zama wani muhimmin mataki da ke tabbatar da zurfin haɗin gwiwar dabarun duniya tsakanin ɓangarorin biyu. Wannan mataki, wanda aka bayyana a ranar 11 ga watan Agusta a birnin Niamey, ya ƙara ƙarfafa amincewa da juna tare da buɗe wani sabon babi a dangantakar tattalin arziki tsakanin China da Afirka. Manufar ta kuma nuna himmar da China ke da ita wajen samar da ci gaba na bai-ɗaya da haɗin kan tattalin arzikin duniya mai cike da adalci, da kuma haɗin gwiwa da ya ginu kan mutunta juna, daidaito, da moriyar juna.
Tsarin FCSA da Manufofin Gwamnatocin
Wannan manufar ta zama aikace a zahiri na alƙawuran da aka ɗauka a ƙarƙashin tsarin Dandalin Tattaunawa Kan Haɗin Gwiwar China da Afirka, wato FCSA. Dandalin na FCSA na da burin tallafa wa masana'antu a nahiyar, da ƙarfafa shigarta cikin jerin kasuwancin duniya, tare da ƙara samar da damammaki ga 'yan kasuwar Afirka. A cewar rahotanni, wannan matakin na taimakawa wajen gina al'ummar China da Afirka mai makoma ta bai-ɗaya. Haka nan, manufar rashin biyan harajin wani muhimmin mataki ne zuwa ga wani sabon salo na haɗin gwiwar tattalin arziƙi da ya fi mayar da hankali kan zuba jari mai amfani. Wannan sabon salon haɗin gwiwar ya ƙunshi sauya fasalin masana'antu, ci gaban ababen more rayuwa, ƙirƙire-ƙirƙire, sauyin fasahar zamani ta intanet, da kuma haɓaka ƙwarewar ma'aikata don cimma burin da aka sanya a gaba.
Fitar da Harkokin Kasuwanci da Zuba Jarin
Ana sa ran manufar za ta ƙara jawo hankalin zuba jarin kamfanonin China a sassan samar da kayayyaki masu inganci, da gina ababen more rayuwa na harkokin sufuri da dabaru. Haka nan kuma, ana hasashen za ta ƙarfafa gina yankunan masana'antu, da wuraren adana kayayyaki, da sarrafa albarkatun gona, tare da inganta musayar fasaha tsakanin ɓangarorin biyu.
A tsawon lokaci, ana ganin wannan tsarin zai hanzarta inganta kayayyakin da Afirka ke fitarwa zuwa ƙasashen waje. Wannan zai kuma ƙarfafa bunƙasar masana'antu masu ƙima a yankunan nahiyar, waɗanda za su iya biyan buƙatun da ake da su a kasuwar China.
A wani yanayi da ake fuskantar takun-saƙar kasuwanci da rashin tabbas a harkokin siyasar duniya, tare da sake kunno kan manufofin kare muradun kasuwanci na cikin gida, wannan yunƙuri na China ya sake jaddada aniyarta ga 'yancin kasuwanci. Haka nan, ya tabbatar da jajircewarta ga buɗe kofa ga tattalin arziƙin duniya, da tsarin tafiyar da harkoki tsakanin ƙasashe da dama, da kuma samar da ci gaba na bai-ɗaya.
Amfanin Nijar a Karkashin Shirin
Ƙasar Nijar na da albarkatun noma da kiwo da kuma ma'adanai masu yawa, gami da babbar dama wajen noman ridi da gyada da wake da kuma ƙaro. Haka nan akwai damammaki a fannin aya da kayayyakin da ake samu daga dabbobi, da sauran kayayyakin da ake iya sarrafawa domin ƙara musu daraja a kasuwa. Wannan sabuwar dama ta musamman ta shiga kasuwar ƙasar China ba tare da cikas ba na iya ƙara yawan kayayyakin da Nijar ke fitarwa zuwa ƙasashen waje.
Ana sa ran wannan tsarin zai ƙarfafa gwiwar sarrafa albarkatun ƙasa a cikin gida, maimakon fitar da su a ɗanyensu. Wannan matakin zai kuma taimaka wajen samar da ayyukan yi, musamman ga matasa da mata a faɗin ƙasar. Ta haka ne za a bunƙasa tattalin arzikin ƙasar tare da rage dogaro da fitar da albarkatu ba tare da an sarrafa su ba, wanda hakan zai haifar da ci gaba mai ɗorewa ga al'ummar Nijar baki ɗaya.
Bayanin Hukumar Kasuwanci
Bayanin da Hukumar Kasuwancin Nijar ta fitar ya ce wannan manufar za ta inganta ci gaban harkokin kasuwanci da zuba jari tsakanin ƙasashen biyu. Hukumar ta kuma ƙara da cewa, wannan damar za ta ƙarfafa gwiwar masu zuba jari na ƙasar China su shigo Nijar, musamman a fannonin da za su bunƙasa fitar da kayayyaki zuwa China.