A wani sako da ta fitar a ranar Lahadi, 5 ga Yuli, 2026, domin bikin cika shekara biyu da kafuwa, Hukumar Kasashen Sahel ta ce ƙasashen mambobinta sun ƙuduri aniyar yaƙar ta'addanci, da kare iyakokinsu, da kuma samun cikakken 'yancin kansu. Hukumar ta jinjina wa shugaban ƙasar Nijar, Janar Abdourahamane Tiani, saboda jajircewarsa wajen tabbatar da manufofin ƙungiyar. An kuma yaba da sakamako mai gamsarwa da aka samu a shekarar farko ta aiwatar da taswirar ƙungiyar a ƙarƙashin jagorancin Janar Assimi Goita, shugaban gwamnatin riƙon ƙwarya na Mali.
Manufofi Da Dama Na Kasashen Sahel
A cikin sanarwar, ƙungiyar ta bayyana cewa ba a kafa wannan haɗakar ba domin adawa da wata al'umma, ko ƙasa, ko wata ƙungiya. Hukumar ta ce haɗakar ta ƙunshi zaɓi ne na 'yanci wanda ƙasashe uku masu cin gashin kansu suka ɗauka da kansu. An kuma bayyana cewa ƙasashen sun yi riƙo sosai da manufofin haɗin kan nahiyar Afirka, da kuma ra'ayin gamayyar Afirka baki ɗaya, da kuma haɗin kan yankuna.
Bayanin ya ƙara da cewa ƙasashen sun yi imani da tattaunawa mai ma'ana da haɗin gwiwa tsakanin al'ummomi. Sai dai, an jaddada cewa dole ne wannan haɗin gwiwar ya dogara ne a kan wasu ƙa'idoji bayyanannu waɗanda ba za a yi sako-sako da su ba. Waɗannan ƙa'idojin sun haɗa da mutunta juna, daidaiton ikon ƙasashe, da kare muradun jama'arsu. Haka nan an lissafa kula da albarkatun ƙasa, da mutunta martabar ɗan adam, da rashin tsoma baki a harkokin cikin gidan ƙasashe, da kuma yin mu'amala ta gaskiya a matsayin ginshiƙan wannan haɗin gwiwar.
Fagen Yaki Da McGani Da Yan Adawa
Hukumar ta ce bikin na bana ya zo ne a cikin wani yanayi na yaƙin tattalin arziƙi da na kafafen yaɗa labarai wanda ba a taɓa ganin irinsa ba a kan ƙasashensu. A cewar sanarwar, manufar wannan yaƙin ita ce a kawo cikas ga ci gaba da tsara haɗakar ƙasashen da kuma lalata ruhin haɗin kan da ke tsakaninsu. An bayyana cewa wajibi ne su ci gaba da kasancewa a shirye domin bayar da martani da ya dace ga waɗannan hare-hare daga maƙiyan zaman lafiya da jituwa da kuma zaman tare cikin lumana. Sanarwar ta Hukumar Kasashen Sahel ta ƙara da cewa ƙalubale irin su matsin lamba daga kafafen yaɗa labarai, da yaƙin yaɗa labaran ƙarya, da kuma amfani da jama'a don cimma wasu manufofi na buƙatar haɗin kai da kuma taka-tsan-tsan tare da aiki tuƙuru.
Huldar Da ECOWAS Da Sabon Tsari
Dangane da hulɗarta da ƙungiyar ECOWAS, Hukumar Ƙasashe Masu Haɗaka ta Sahel ta ce tana ci gaba da tattaunawa da ƙungiyar ta yankin Afirka ta Yamma. Sanarwar ta bayyana cewa manufar waɗannan shawarwari ita ce a gina wani sabon tsarin alaƙa da ECOWAS. An bayyana cewa dole ne wannan sabon tsarin ya ginu a kan girmama matakan da ƙasashe masu cin gashin kansu suka ɗauka. An kuma jaddada mahimmancin kiyaye nasarorin da aka riga aka samu a fannin haɗin kan yankin. Haka nan, dole ne a ba da kariya ga muradun al’ummomin Afirka ta Yamma, waɗanda suka haɗa da tabbatar da walwalar zirga-zirgar mutane da kayayyaki tsakanin ƙasashen yankin.
Mataki Na Gaba Ga Hukumar Kasashen Sahel
Sanarwar ta ce bikin cika shekaru biyu na kafuwar hukumar ya zama wata alama ta ci gaba da wani sabon mataki na kare yankin baki ɗayansa. Wannan mataki ya kuma ƙunshi haɗin kan tattalin arziƙi, da daidaiton zamantakewa, da bunkasa masana'antu, da kuma samar da wadataccen makamashi da abinci. Sauran abubuwan da aka lissafa sun haɗa da sarrafa arziƙin cikin gida, da ƙarfafa walwalar zirga-zirga, da kuma haɗa ƙarfi da ƙarfe a fannonin kimiyya, fasaha, ilimi, da masana'antu.
Hukumar ta ƙara da cewa ya kamata haɗakar ta zama wani wuri da al'ummominta za su amfana da arziƙin ƙasashensu, matasa kuma su samu damammaki. An kuma bayyana cewa burin shi ne a samar da wani yanayi da masu sana'o'i za su samar da arziƙi, masu bincike su ƙirƙiro sabbin abubuwa, 'yan kasuwa su saka hannun jari, sojoji kuma su tabbatar da zaman lafiya da tsaro ga kowa da kowa a yankin.